بما ان الابليكيشن رجع،. ايه اللي اتغير فيك من ساعة ما قفل اول مرة لحد دلوقتي؟

Question

شـامـيـة ᥫ᭡ · Accepted Answer

بقيت أنضج وأهدأ بكتير.. بقيت أشوف وأراقب أكتر ما أتكلم أو أتدخل، وأعدّي حاجات كتير كنت زمان بقف عندها طويلًا، وأستنزف نفسي في التفكير فيها.

ربنا رزقني بزيارة مكة والمدينة، وما كانتش مجرد عمرة، بل كانت رحلة اتعلمت فيها حاجات كتير، وعشت خلالها مشاعر ما عشتهاش من قبل. اللهم عودةً في عفوٍ وعافية. 🩵

مريت بفترة صحتي فيها ما كانتش كويسة خالص، وعدّت بفضل الله ورحمته. واكتشفت قد إيه لَمّة الأهل ووجودهم جنبك وقت ضعفك نعمة كبيرة تستحق الحمد في كل وقت. ربنا يبارك لي فيهم، ويخليهم ليا سندًا وعِزوةً وأمانًا.

وعشت تجربة صعبة، من أصعب ما مررت به، تجربة بمشاعر قاسية عقلي ما كانش قادر يستوعبها، ولسه لحد دلوقتي بيحاول يستوعبها. انهرت نفسيًا وجسديًا، وحاولت بكل ما أملك إن الأمور تبقى كويسة، وبذلت كل اللي أقدر عليه، لكن الأمور ازدادت سوءًا، لحد ما القرار ما بقاش في إيدي.

والحمد لله على نعمة الدين، والأخلاق، والتربية، والعلم، والأهل.. النعم اللي اجتمعت كلها في وقت كنت فيه في أشد الحاجة إليها، وكانت سببًا بعد فضل الله في إني أقف تاني على رجلي، وأستعيد نفسي واحدة واحدة، وأبقى أحسن.

اتعلمت إن مش كل حاجة بنحارب علشانها بتتصلح، وإن مش كل الطرق اللي بنستنزف نفسنا علشان نكمّل فيها بيكون مكتوب لنا نكمّلها.. وإن أحيانًا بيكون في التسليم لأمر الله نجاة، وفي تقبُّل ما لم نختره بداية لحياة ما كنّاش نتصورها.

الحمد لله على ما مضى، والحمد لله على ما نحن فيه، والحمد لله على ما سيأتي.. فكل أمر الله خير، وإن خفيت علينا حكمته، وكل ما نرجوه أن يرزقنا الله الرضا بما قدّر، والعوض عمّا فقدنا، والسكينة بعد كل اضطراب.

واللي جاي بإذن الله كله فرح وخير، وجبر خاطر، وراحة بال.. في عفوٍ وعافية. 🩵

بما ان الابليكيشن رجع،. ايه اللي اتغير فيك من ساعة ما قفل اول مرة لحد دلوقتي؟

شـامـيـة ᥫ᭡

..

انصحيني نصيحة

..

Talk..

صورة للطبيعة من تصويرك 🍂